Mateo 8:28-34. Unsa may atong
palabihon, ang Dios o ang materyal nga bahandi? Ang ebanghelyo nagsaysay sa
pag-abog ni Jesus sa mga yawa gikan sa duha ka tawo ug ngadto sa panon sa mga
baboy. Ang mga baboy nga gibalhinan sa mga yawa nangambak sa lanaw ug
nangalumos. Imbis malipay ang mga tawo sa Gadara, nangamuyo hinuon sila kang
Jesus sa pagbiya sa ilang dapit. Gisayangan sila sa nawalang mga baboy ug mas
palabihon pa nila nga mawala si Jesus kaysa ilang kahayopan. Kon anaa si Jesus
sa atong kinabuhi, makuhaan kita og mga kahigayonan nga madato. Dili na ta
makapanikas, dili na ta makapangurakot, ug dili na ta makanegosyo og ilegal.
Labaw sa tanan, madasig na kita sa pagpaambit sa atong mga katigayonan. Ang
pangutana: Hawiran ba nato si Jesus o papahawaon usab nato Siya?
