Mateo 8:23-27. Mabalak-on ba
kita ug mahadlokon? Taliwala sa dakong unos, ang mga tinun-an nga diha sa
sakayan nalisang pag-ayo bisan uban kanila ang Ginoo. Tungod niini, giingnan
niya sila, “Pagkagamay sa inyong pagtoo!” Dili ba sama man usab kita sa mga
tinun-an? Dali ra kitang mabalaka ug mahadlok kon hadlaon na kita sa mga unos o
suliran sa kinabuhi. Usahay gani mabalaka kita sa mga butang nga dili angay'ng
kabalak-an. Kon adunay dakong problema, natural lamang nga kita maguol ug
mabalisa. Apan kon ang Ginoo anaa kanato, dili ba angay kitang magpabiling
lig-on ug maisogon? Sa iyang pagpahunong sa dakong unos, gipakita ni Jesus
kanato nga kontrolado niya ang tanan nga mahitabo ning kalibotan. Busa, itugyan
nato kaniya ang atong kinabuhi kay dili gayod kita niya pasagdan.
