Mateo
13:1-9. Kinsa man ang tawo nga makahimo’g daghang maayong buhat? Sa Sambingay
sa Tigpugas atong masabtan nga ang liso, nga mao ang Pulong sa Dios, mabuhi,
motubo, ug mamunga’g daghan kon kini mahagbong sa maayong yuta. Unsa o kinsa
man kining maayong yuta? Ang maayong yuta mao ang tawo nga adunay maayong
kasingkasing ug hunahuna para sa Pulong sa Dios. Andam ug mahinangpon siya
kanunay nga modawat sa Pulong sa Ginoo. Matag adlaw, mangita siya’g kahigayonan
nga mohunong sa iyang mga buluhaton aron maghilom, magbasa sa Pulong sa Dios,
mag-ampo ug mamalandong niini. Ang Pulong sa Dios adunay talagsaong gahom, ug
ang tawo nga modawat niini sa matag adlaw mamunga gayod og daghang maayong
buhat.
