15TH SUNDAY IN ORDINARY TIME (YEAR B)

Am 7: 12-15; Eph 1: 3-14; Mk 6: 7-13

Ang ebanghelyo ning Domingoha magpahinumdum kanato sa atong pagkamagsasangyaw, ug sa kinaiya nga angay natong dalhon diha sa pagtuman sa atong misyon.

Ang simbahan usa ka misyonaryo nga katawhan. Ang iyang kinabuhi ug kaanindot dalhon gayod sa bisan asa nga dapit aron ipaambit sa tanan. Atong sayran nga si Hesus nagdapit og mga sumusunod dili aron mahimong pundok sa katawhan nga magkinaugalingon, kondili aron mosunod sa iyang mga lakang ug magsangyaw mahitungod sa dakong gugma sa Dios. Nagtawag siyag mga tawo dili aron mag-atiman kaniya kondili aron mag-alagad sa katilingban, dili aron magtrabaho para kaniya kondili aron magtrabaho uban kaniya para sa katukoran sa Gingharian sa Dios.

Importante kaayo nga puy-an nato ang atong dignidad ug misyon isip mga anak sa Dios. Diha sa bunyag, nahimo kitang mga Kristiyanos ug nakadawat og misyon sa pagsangyaw sa Maayong Balita. Dili maayo nga Kristiyanos lamang kita sa ngalan kondili sa buhat usab. Dili angay nga Kristiyanos lamang kita matag Domingo kondili sa matag adlaw sa atong kinabuhi. Dili maayo nga Kristiyanos lamang kita sa sulod sa simbahan kondili sa tanang dapit diin kita mahimutang. Ang atong pagkabinunyagan nagtawag kanato nga molakaw sa kalibutan aron magpaambit sa gugma sa Dios ngadto sa isigkaingon ug sa tanang panahon.

Daghang pamaagi ug kahigayonan sa pagpuyo sa atong pagkakristiyano. Pananglitan, ang usa ka pulis mahimong tinuod nga Kristiyano pinaagi sa pagmatinud-anon sa pagbantay sa kalinaw ug sa dili pagdawat og soborno. Ang usa ka magtutudlo mahimong tinuod nga Kristiyano pinaagi sa paghatag og maayong pagtulun-an ug panig-ingnan ngadto sa mga estudyante. Ang usa ka negosyante mahimong tinuod nga Kristiyano pinaagi sa pagpamaligya nga dili ubanan og pamintaha. Ang usa ka drayber mahimong tinuod nga Kristiyano pinaagi sa mabinantayong pagmaneho ug sa pagrespeto sa mga pasahero. Ug ang usa ka politiko mahimong tinuod nga Kristiyano pinaagi sa tinuoray nga pagpanerbisyo ug sa dili pagpanghilabot sa pundo sa gobyerno.

Diha sa ebanghelyo, gipadala ni Hesus ang iyang mga tinun-an nga magtinagurhaay. Sa ilang panahon, dili maayo ang pagbiyahe nga mag-inusara tungod kay adunay mga tulisan diha sa dalan. Sa ilang pagsangyaw, ang mga tinun-an angay nga magtinabangay ug magbantay sa usag-usa. Kini nga pamaagi magpahinumdum kanato nga ang Kristohanong misyon dili pribado nga trabaho. Sa atong pagsangyaw, magtinabangay kita tungod kay dili sayon ang gisangon nga misyon. Manginahanglan kita sa tabang sa usag-usa aron magmalampuson sa trabaho nga gisangon kanato ni Kristo.

Ang usa ka estudyante madasig sa pagtuon kon tabangan siya sa iyang mga klasmet nga makasabut sa ilang leksyon. Ang usa ka nurse madasig sa pag-alagad sa mga pasyente kon ang iyang mga kauban sa ospital mainiton usab sa ilang pag-atiman sa mga masakiton. Ang usa ka kagawad sa lungsod mahagit sa pagpanerbisyo kon ang iyang mga kauban sa konseho dili mag-apil sa pagpangurakot. Ug bisan gani ang usa ka pari madasig sa paghatag sa iyang kinabuhi para sa katawhan kon ang iyang mga kaubang pari magpuyo usab nga matinud-anon sa ilang bokasyon. Kon ang atong mga kaigsoonan, kahigalaan, ug kauban sa trabaho magtinapolan o magpasagad sa ilang mga obligasyon, bati-on kitag kaluya ug mawad-ag gana sa pagpangalagad. Busa, angay gayod kitang magtinabangay aron dili kita mahutdag kadasig sa pagtuman sa atong misyon.

Sa ilang pagsangyaw, gimandoan ni Hesus ang iyang mga tinun-an sa dili pagdalag bisan unsa gawas sa sungkod. “Walay pagkaon, walay sako, walay kwarta.” Sa panahon ni Kristo, praktikal kini nga sugyot. Ang magsasangyaw maglakaw sa lagyo nga mga dapit ug angay lamang nga dili magdalag bug-at nga mga gamit. Gawas pa niini, ang kwarta ug materyal nga mga butang maoy makadani sa mga tulisan nga mag-atang diha sa dalan.  Busa, sa ilang pagbiyahe, ang mga sumusunod ni Kristo angay lamang magsalig sa tabang sa Ginoo ug sa kaayo sa mga tawo.

Bisan tuod lahi na karon ang atong panahon ug kahimtang, angay gihapon natong hatagag gibug-aton kining pahimangno ni Kristo sa pagkinabuhi nga gawasnon sa mga materyal nga butang. Ang kalibutanong bahandi maayo man kon kini makapaduol kanato sa Dios ug makapahimo kanatong mahigugmaon sa isigkaingon. Apan subay sa kasinatian, kon daghan ra kaayo ang mga materyal nga butang, maglisud kita sa pagsabut sa plano sa Dios para kanato ug dili na hinuon kita makasunod ni Kristo.

Busa, angay gayod nga atong susihon sa tinuoray kon unsa ang papel sa atong mga kabtangan diha sa atong pagsunod kang Kristo. Ang atong bahandi nakapaduol ba nato sa Dios o nakapalayo kaniya? Nakahimo ba kini natong mas mahigugmaon, mas manggihatagon, ug mas manggiloloy-on sa atong isigkaingon?