OUR LADY OF MOUNT CARMEL (YEAR B)

JUAN 19:25-27. DIS-A MAN GIKAN ANG ESKAPULARYO SA BIRHEN SA CARMEN UG UNSA MAN ANG MGA ESPIRITUHANONG KAAYOHAN NGA MADAWAT SA TANANG MAGSUL-OB NIINI? Niadtong Hulyo 16, 1251, ang Mahal nga Birhen nagpakita kang San Simon Stock, ang padre heneral sa mga Carmelites, ug nihatag kaniya og usa ka Eskapularyo nga kolor brown. Sa pagtunol niini, ang Birhen nanaad sa pag-ingon: “Pinangga kong anak, dawata kining Eskapularyo sa imong kapunongan: usa kini ka talagsaong pabor nga akong gipangayo para kanimo ug sa imong mga kaubanan, nga mga anak sa Carmen. Ang tanang mamatay nga magsul-ob ning Eskapularyo dili gayod makasinati sa kalayo nga walay pagkapalong. Mahimo kini nga timaan sa kaluwasan, panalipod panahon sa katalagman, ug garantiya sa kalinaw.”