MONDAY OF THE 14TH WEEK IN ORDINARY TIME (YEAR B)

MATEO 9:18-26. UNSA MAY ANGAY NATONG BUHATON KON KITA ADUNAY PANGAYOON SA GINOO? Ang opisyal diha sa ebanghelyo naghatag kanato og maayong ehemplo. Bisan habog ang iyang nahimutangan sa katilingban, ang opisyal niluhod sa atubangan ni Hesus ug nangaliyupo kaniya. Sa iyang pagluhod, gipakita sa opisyal ang iyang pagkamapaubsanon ug ang iyang pag-ila sa gahum sa Dios. Bisan unsa kadato, kabantogan, ug kagamhanan ang usa ka tawo, adunay daghang mga butang nga dili niya mahimo. Apil niini ang pagtambal sa grabeng sakit ug ang pagpugong sa kamatayon. Ang Dios lamang maoy makahimo sa tanang butang, ug siya maoy una natong sangpiton kon kita may problema o matumba. Matod pa sa magsusulat, “When life knocks you down to your knees, you are in the perfect position to pray.”