1ST SUNDAY OF LENT (YEAR B)

Gen 9:8-15; 1 Pet 3:18-22; Mk 1:12-15

Niadtong nilabay nga Mierkoles nagsugod ang panahon sa kwaresma. Gihimo nato ang pagpamadlis og abo sa agtang agi’g pagpakita sa pagdawat nato sa atong pagkatawhanon ug sa atong determinasyon nga maghinulsol sa atong mga kasal-anan. Kita tawo lamang, huyang ug dali madani sa kadaotan. Apan, nagpabilin kitang masaligon nga inubanan sa panabang sa Dios, mabuntog nato ang gahum sa yawa ug mabiyaan ang sala.

Ang labing dakong tumong sa kwaresma mao ang paghimo og espiritwal nga pagpangandam alang sa kasaulogan sa paghalad ni Kristo sa iyang kinabuhi ug sa iyang madaugong pagkabanhaw. Ang mga pagbasa niadtong Mierkoles Badlis nagpahinumdum kanato sa mga naandan nga gimbuhaton sa panahon sa kwaresma: matinud-anong pag-ampo, pagpuasa o pagsakripisyo, ug pagtabang sa mga kabos. Kining tulo maoy giisip nga labing lig-on nga pangkontra sa tintasyon sa yawa.

Motuo ba kamo nga adunay yawa? Ang pulong nga “Satanas” (satan'el in Hebrew) o “Diyablo” (diabolos in Greek) nagpasabut og kaaway. Si Satanas mao ang kaaway nga magdala sa tawo ngadto sa kaalaotan. Ang ebanghelyo nagsaysay kanato nga si Kristo gitintal ni Satanas didto sa kamingawan sulod sa kwarenta ka adlaw. Apan nagpabilin siya nga malig-on ug ang mga anghel sa Dios nitabang kaniya.

Bisan tuod dili nato makita si Satanas, atong mabati nga siya nagalihok gayod aron kita mahilayo sa Dios. Sugod sa sayong kabuntagon hangtod sa lawom nga kagabhion, kapila man nato masinati ang lihok ug pagtintal sa yawa? Nadungog mo ba siya sa dihang siya niingon: “Duol ngadto sa imong mga silingan nga nagtapok kay nindot ang tsismis didto.” “Daota ang imong isigka-trabahante aron madaot ang iyang pangalan ug ikaw nay ipuli sa iyang taas nga posisyon.” “Unaha ang imong kaugalingon kay basin maalkanse ka.” “Pagkodigo aron modako ang imong grado.” “Panikas sa negosyo aron madato ka.” “Pangabit aron ilhon ka nga tinuod nga lalaki.” “Gawas lang og una sa opisina. Dili bitaw ka mahinungan.” “Inum og daghan samtang nia pa ka sa kalibutan. Sa langit wala nay beer.” “Ayaw kahadlok mangawat sa kwarta sa gobyerno kay daghan man mo naghimo ana.” “Palit og mahalon nga butang aron daygon ka sa mga tawo.” “Unya na lang pagtarong sa imong kinabuhi kon matigulang naka. Pasayloon bitaw ka sa Dios.” Ang mga pulong sa yawa nindot apan makadaot.

“Ayaw lang gayod patintal.” Nasayod kita nga sayon lang ni isulti, apan lisud buhaton. Ang yawa makamao mogamit og panagway nga maanyag, lawas nga makadani, ug mga butang nga makasilaw. Ug sumala sa atong kasinatian, dili sayon ang pagbalibad sa tintasyon ni Satanas. Apan, ang maayong balita sa ebanghelyo para kanato karon mao kini: Si Kristo nagmadaugon batok sa mga tintasyon sa yawa. Walay nahimo kaniya si Satanas! Tungod niini, kita nahatagan og dakong kadasig ug kaisog. Inubanan ni Kristo, aduna kitay katakos nga magdumili sa tintasyon sa yawa ug magmadaogon batok sa gahum ni Satanas.

Niining panahon sa kwaresma, moduol kita sa sakramento sa kompisal ug ihalad nato ang atong mga sala ngadto ni Kristo. Uban sa pagpasaylo sa Ginoo, madawat usab nato ang dugang grasya ug kusog nga mao unyay atong gamiton sa pagpakigbatok sa yawa.