THURSDAY OF THE 4TH WEEK IN ORDINARY TIME (YEAR B)

MARCOS 6:7-13. Kinahanglan ba nga kita edukado ug adunahan aron mahimong magsasangyaw sa gugma sa Dios? Kon ang ebanghelyo maoy atong pangutan-on, ang tubag “dili”. Una sa tanan, ang unang magsasangyaw nga gipili ni Kristo mga tawong simple ug ordinaryo, igo lang ang kahibalo ug walay ikapanghambog nga bahandi. Apan, gihatagan sila ni Hesus og gahom sa pagbuhat sa iyang buluhaton – paghingilin sa mga yawa, pag-ayo sa mga masakiton, ug pagsangyaw sa Pulong sa Dios. Ang gahom nga nagagikan kang Hesus mao lamang ang saligan sa mga tinun-an, dili ang ilang kahibalo ug ang ilang mga butang. Nindot kini nga pahimangno para kanatong mga binunyagan diha ni Kristo. Ang atong kawad-on ug kakabos dili rason nga modumili kita sa pagsangyaw sa gugma sa Dios ngadto sa isigkatawo.