WEDNESDAY OF THE 4TH WEEK IN ORDINARY TIME (YEAR B)

HEBREO 12:4-7,11-15. Angay ba natong disiplinahon ang atong mga anak o dili na? Adunay mga ginikanan nga moingon, “Malooy ko sa akong anak ug kutob sa mahimo dili nako balibaran ang iyang mga gipangayo.” Ang uban moingon, “Pinangga nako ang akong anak ug dili gyod nako siya kasab-an o silotan.” Apan, unsa may mahitabo sa mga anak nga patughan sa ilang gusto ug dili badlongon sa ilang mga daotang nahimo? Kasagaran, ang mga batang pinasagdan mahiagom sa kaalaotan. Ang Sulat ngadto sa mga Hebreo nagpahinumdum kanato nga bisan ang Dios magdisiplina sa iyang katawhan. “Anak, ayaw isipa nga diyotay ray bili ang pagkastigo sa Ginoo kanimo, ug ayaw kaluya kon badlongon ka niya. Kay kastigohon sa Dios ang tanan nga iyang gihigugma, ug latoson ang tanan nga iyang sinagop ingon nga anak.”