MATEO 6:7-15. Unsa man ang maayong paagi sa
pag-ampo? Si Hesus miingon, “Kon kamo mag-ampo, ayaw gamita ang daghang pulong
sama sa gibuhat sa mga pagano nga nagtoo nga pinaagi sa daghang pulong sila
pagadunggon.” Tukma kaayo ang maong pahimangno ning panahon sa Kwaresma kanus-a
kita giawhag sa pagpalawom sa atong pag-ampo. Diha sa pag-ampo, dili ang
gidaghanon sa mga pulong maoy importante kondili ang kamatinud-anon sa atong
kasingkasing. Sa pag-ampo, angay kitang mogahin og panahon sa pagpaminaw sa mga
Pulong sa Dios ug sa pagpamalandong niini sa kahilom. Dili kinahanglan nga kita
ang magsigi'g yawit kay, matud pa ni Hesus, ang Dios Amahan nasayod nang daan
kon unsa ang atong gikinahanglan bisan sa wala pa kita mangayo.
No comments:
Post a Comment