24TH SUNDAY IN ORDINARY TIME (YEAR B)

Marcos 8:27-30

Usa ka pari ang nahimong inila nga magwawali. Bisan asa siya magmisa, modugok ang mga tawo nga gustong maminaw kaniya. Inig kahuman niya'g wali, manindog ang tanan ug mamakpak sa ilang mga kamot.

Nanghambog kining pari sa iyang obispo. “Bishop, ang mga tawo malipay pag-ayo kon ako ang magmisa. Pakpakan ko nila inig human nako’g wali.”

“Oo padre, nabalitaan nako”, matud sa obispo. “Pero, naglibog ko. Human nimo'g wali, mamakpak ang mga tawo. Pero human sa iyang pagwali, si Kristo gibiaybiay, gisakit ug gipatay sa mga tawo.”

Sa pagsangyaw, ang pari angay nga mosulti sa tinuod, dili sa unsay ganahan nga madunggan sa mga tawo. Ang kamatuoran usahay sakit paminawon. Ug tungod niini, ang usa ka matinud-anong magwawali, sama kang Kristo, usahay pagasakiton ug patyon tungod sa kamatuoran nga iyang gisangyaw.

Sa ebanghelyo karong Domingoha, atong nasayran nga nagkalain-lain ang pag-ila sa mga tawo kang Hesus. Tungod sa iyang mainitong pagsangyaw, ang mga tawo motandi kaniya kang Juan nga Magbubunyag, kang Elias ug sa ubang mga propeta. Apan, walay usa nga nakatugkad sa iyang tinuod nga pagka-siya. Busa si Hesus nangutana sa iyang mga tinun-an, “Para kaninyo kinsa man ako?” Ug si Pedro miingon, “Ikaw mao ang Kristo (o Mesiyas)!”

Sakto ang tubag ni Pedro, apan ang iyang pagsabot mahitungod sa Mesiyas lahi kaysa pagsabot ni Hesus sa iyang kaugalingon. Sa dihang si Hesus naghisgot sa iyang umaabut nga pag-antos ug kamatayon gikan sa kamot sa mga lederes, mga pangulong pari ug mga magtutudlo sa Balaod, gibadlong siya ni Pedro, “Ginoo, dili kana mahitabo kanimo!” Si Pedro ug ang mga Hudiyo adunay kaugalingong pagsabut mahitungod sa Mesiyas. Ang Kristo, para kanila, usa ka political ug military leader nga makig-away para kanila ug moluwas kanila batok sa tanang mga kaaway. Apan, para kang Hesus, ang Mesiyas moluwas sa tawo pinaagi sa paghalad sa iyang kinabuhi.

Gipangutana ni Pope John Paul II ang grupo sa mga kabataan: “Unsa man ang pinakaunang letra sa Alpabeto sa Ginoo?”

Ang mga bata mitubag: “Letra nga 'A'!”

Apan ang Santo Papa miingon: “Dili. Para sa Ginoo, ang labing una nga letra mao ang “t” tungod kay dinhi makita ang timaan sa krus.”

Sa mga mata sa kalibutan, ang krus maoy simbolo sa kabangis ug kamatayon, apan sa mata sa Dios, ang krus maoy timaan sa dakong gugma ug kinabuhi. Para sa mga tawo, ang krus simbolo sa kaulawan ug kapildihan, apan para sa Dios, ang krus maoy timaan sa himaya ug kadaogan. Gani, ang gugma mahimo lamang tinuod kon kini andam magsakripisyo ug maghatag sa kaugalingon para sa uban. Mao kini ang matang sa gugma nga gipakita ni Hesus kanato.  

“Para kaninyo si kinsa man ako?” Kining pangutana ni Hesus para sa iyang mga tinun-an magpahinumdum kanato sa kabililhon sa sakto nga pag-ila kaniya. Ang sakto nga pag-ila sa Dios makatabang kanato sa pagsabot sa atong kinabuhi ug misyon diha sa Simbahan. Samtang ang sayop nga pag-ila sa Dios kasagaran maoy hinungdan sa sayop nga pagsabot sa kinabuhing Kristohanon.

Duha ka bata ang nagtindog atubangan sa larawan sa Sacred Heart of Jesus. Nakabantay ang usa kanila nga bisan asa sila mobarog, ang mga mata sa Ginoo motan-aw kanila. Gipangutana niya ang kauban, “Ngano man nga bisan asa kita mobarog magsunodsunod ang mga mata ni Hesus kanato?”

Ug mitubag ang laing bata sa pag-ingon, “Magsigi man gud na siya og bantay kon aduna kitay sayop nga buhaton.”

Apan miingon ang unang bata: “Dili tingali oy. Magsunodsunod ang mga mata ni Hesus kanato tungod kay magbantay man na siya nga walay daotang mahitabo kanato.”

Kon magtoo kita nga si Hesus usa ka mahukmanong Dios, malagmit magpuyo kita kanunay nga puno sa kahadlok kaniya. Mosunod kita sa balaod dili tungod kay nasayod kita nga kini ang sakto kondili tungod lamang sa kahadlok sa silot sa Ginoo. Apan, kon mailhan nato si Hesus nga usa ka Maayong Magbalantay, malagmit nga magpuyo kita nga masaligon ug malipayon. Mosunod kita sa iyang mga sugo dili tungod sa kahadlok sa silot sa impyerno kondili tungod kay kumbinsido kita nga kini maoy sakto.

Kon ang atong pag-ila ni Hesus usa lamang ka Dios nga harianon, labing siguro magpunay kita og hunahuna unsaon paglipay kaniya. Kanunay kitang maproblema kon unsa nga mga butang o bahandi ang ihalad ngadto kaniya. Apan, kon makita nato kang Hesus ang usa ka mahigugmaong Dios, malagmit mabati nato sa matag adlaw ang Iyang pag-amoma ug pagpahiluna sa atong kinabuhi. Tungod niini, magmapasalamaton kita ug magmatarong agi'g balos sa iyang kaayo ug gugma.