WEDNESDAY OF THE 24TH WEEK IN ORDINARY TIME (YEAR B)

LUKAS 7:31-35. UNSA MAY MAKAPAHIMO SA TAWO NGA SIRADO SA PAGPAMINAW SA PULONG SA GINOO? Daghan sa mga Hudiyo nagreklamo sa mga paagi ni Juan; nagbagolbol usab sila sa mga gipanghimo ni Hesus. Aduna bay sayop si Juan ug Hesus? Wala. Sa pagkatinuod, kining mga tawhana aduna nay naandan nga pamaagi ug dili na abli sa bag-ong panghunahuna. Bisan sa atong panahon, adunay mga tawo nga sama niini’g kinaiya – magsigi la’g panaway sa gihimo sa uban; apan sa ilang kabahin wala usay gihimo nga kaayohan. Dili nimo matambagan kay dili maminaw ug magtuman sa ilang kagustohan. Adunay panultihon, “The hardest thing to open is a close mind”, o “ang pinakagahi ablihan mao ang hunahuna nga sirado.” Ang hinungdan sa ingon nga batasan mao ang garbo. Ang garboso dili gayod makasabot sa kabubut-on sa Ginoo.