WEDNESDAY OF THE 23RD WEEK IN ORDINARY TIME (YEAR B)

LUKAS 6:20-26. NGANONG PROBLEMA MAN ANG BAHANDI? Sa pagkatinuod, ang bahandi dili maoy problema kondili kita. Kita ang dili makamaong mogamit sa mga butang ning kalibotan. Dali ra kitang mahimong laug, ug tungod niini, dili kita mopaambit sa unsay ato ngadto sa uban. Tungod sa kagustohan nga modaghan ang bahandi, makat-on kita sa pagpamintaha ug pagpanikas. Imbis makatabang, ang bahandi mao na hinooy hinungdan sa pagkadaot sa atong relasyon sa Dios ug sa isigkaingon. Ang tawo maglisod gayod pagsulod sa langit kon dili siya makat-on pagbiya sa iyang bahandi. Huot ang pultahan sa langit dili tungod kay kini gamay kondili tungod kay ang masulod niini mao lamang ang maayong pagkatawo ug binuhatan, dili ang kalibotanong mga butang. Sakto ang giingon ni B.C. Forbes, “Real riches are the riches possessed inside.”