SATURDAY OF THE 22ND WEEK IN ORDINARY TIME (YEAR B)

LUKAS 6:1-5. HANGTOD KANUS-A MAN NATO SUNDON ANG MGA BALAOD? Sa ordinaryong kahimtang, ang mga maayong balaod angay gayod nga sundon. Kini tungod kay ang mga balaod gihimo man alang sa kaayohan ug kalamboan sa tawo. Apan, kon ugaling ang usa ka balaod mahimong babag sa kaluwasan sa tawo, dili na kini angay’ng tumanon. Kini ang gitudlo ni Kristo pinaagi sa pagtugot sa mga tinun-an sa pagpangutlog mga uhay sa trigo bisan tuod adlaw kadto nga Igpapahulay aron sila makakaon. Sa samang paagi, mahimo nato ang pagtrabaho sa Adlaw nga Domingo kon adunay seryosong hinungdan sa pagbuhat niini, sama sa pagluwas og kinabuhi sa mga tawo. Kining ebanghelyo dili unta magdasig kanato sa pagsupak sa mga balaod kondili sa pagsabot sa espiritu ug katuyoan sa matag usa niini.