MONDAY OF THE 23RD WEEK IN ORDINARY TIME (YEAR B)

LUKAS 6:6-11. NGANONG DOMINGGO MAN ANG ADLAW’NG IGPAPAHULAY PARA SA MGA KATOLIKO? Alang sa mga Hudiyo panahon sa Bibliya ug bisan karon, ang Sabado mao ang Adlaw’ng Igpapahulay tungod kay kini man ang ikapitong adlaw sa semana. Sama nga ang Dios Magbubuhat nipahulay sa ikapitong adlaw sa iyang pagpanggama, sila usab mopahulay sa pagtrabaho ning maong adlaw. Apan, ang Bibliya nagmatuod nga human sa Pagkabanhaw ni Kristo, ang mga tinun-an nagsugod na sa pagtapok alang sa pag-ampo ug pagpikas-pikas sa Pan sa unang adlaw sa Semana nga mao ang Domingo (Buhat 20:15; 1 Cor 16:1-2). Ang Domingo nahimong Adlaw’ng Igpapahulay sa mga Kristiyano tungod kay kini magpahinumdum sa Pagkabanhaw ni Hesus, nga mao ang pinakadakong kadaugan nga nahitabo sa kasaysayan – ang kadaugan batok sa kamatayon.