Lucas 3:15-16, 21-22
Karong adlawa gisaluog sa Simbahan ang piyesta sa Pagbunyag
sa Ginoo. Gipasabot sa mga teologo ang hinungdan sa pagpabunyag ni Cristo kang
Juan. Kini dili tungod kay nanginahanglan siya’g kapasayloan kondili tungod kay
gusto niyang makighiusa sa katawhan. Nakighiusa si Jesus sa atong pagkatawhanon
aron kita madala niya sa pagkadiosnon. Ingon niini ang kinaiya sa tinood nga
gugma – andam magpaubos aron ipataas ang hinigugma.
Human nabunyagi si Cristo, dihay tingog nga nadugog gikan sa
langit: “Ikaw mao ang pinangga kong Anak. Nalipay ako pag-ayo kanimo.” Ang
maong mga pulong naghatag kang Cristo og kasiguroan sa dakong gugma sa iyang
Amahan. Naghatag usab kini kaniya’g dakong kusog ug kaisog sa pagtuman sa
misyon nga gisangon kaniya sa Amahang Langitnon. Nindot kini nga punto para sa
mga ginikanan. Kon gusto kamo nga mahimong lig-on ug matarong ang inyong mga
anak, ipabati kanila ang inyong dili kaduhaduhaang gugma para kanila.
Ang pagbunyag ni Juan, ginamit ang tubig, nagtumong sa
paghugas sa mga sala. Apan, si Juan mismo ang nagtudlo sa talagsaong bili sa
bunyag nga pagahimoon ni Cristo: “Nagbunyag ako kaninyo pinaagi sa tubig. .
. magbunyag siya kaninyo pinaagi sa
Espiritu Santo ug sa kalayo.” Diha kang Cristo, ang mga binunyagan dili lamang
mahugasan sa sala; madawat usab nila ang dakong dungog sa pagka-anak sa Dios.
Adunay inilang hari sa Francia nga ginganlag Louis. Matag
tuig saulogon niya ang kasumaran sa iyang bunyag, dili ang adlaw sa iyang
natawhan. Sa dihang gipangutana kon ngano, siya mitubag: “Para kanako, mas
bilihon ang akong pagkahimugso sa Gingharian sa Dios kaysa akong pagkahimugso
sa kalibutan.” Adunay punto ang maong hari, nga karon giila sa Simbahan nga
Saint Louis IX. Ang bunyag bililhon kaayo tungod kay kini maghimo kanatong anak
sa Dios ug manununod sa Gingharian sa Langit.
Ning kapistahan sa Pagbunyag sa Ginoo, hinaot nga madasig kita
sa paghatag og bili sa atong pagkabinunyagan ug pagka-anak sa Dios. Ipakita
unta nato nga kita angayan nga tawgon nga mga sumusunod ni Cristo ug manununod
sa gingharian sa Dios. Human ning maong Piyesta, mosugod kita ning gitawag sa
Simbahan og “Ordinaryong Panahon”. Ang Ordinaryong Panahon bililhon gihapon
tungod kay diha sa ordinaryo ug inadlaw-adlaw natong kinabuhi kita gitawag nga
mosunod sa mga lakang ni Cristo. Adunay mga tawo manggihatagon lamang kon
Pasko. Kon dili Pasko, laog kaayo ug dili makamaong malooy sa isigkatawo. Ang
uban maghinulsol lamang kon Kwaresma. Human sa Kwaresma pwerteng salbahisa.
Dili kini sakto. Ang tinood nga Kristiyano buotan ug kasaligan bisan sa panahon
nga ordinaryo.
