Marcos
1:40-45. Tinuod ba nga ang sakit usa ka silot gikan sa Dios? Sa panahon ni
Jesus ang mga sanlahon giisip nga hugaw kaayo ug dakong makasasala. Ang ilang
kahimtang gitan-aw nga silot gikan sa Dios. Gidid-an sila nga moduol sa mga
tawo aron dili makatakod ug dili makahimong hugaw sa uban. Apan si Cristo wala
mosunod ning maong mentalidad. Gani, gitugotan niya ang usa ka sanlahon nga
moduol kaniya. Iya kining gihikam ug giayo sa iyang sakit – usa ka pagpakita
nga ang sanlahon wala isalikway sa Dios. Nindot kini nga balita alang sa mga
masakiton. Dili nila angay’ng isipon nga sila gipanghimaraot sa Ginoo. Kon duna
man silay sala, mangayo sila’g pasaylo. Hunahunaon nila nga sila duol sa
kasingkasing sa Ginoo ug gusto Niya nga sila mapasaylo ug mamaayo.
