Marcos
2:13-17. Unsa may gipasabot ni Jesus sa iyang pag-ingon, "Wala ako moanhi
alang sa mga matarong kondili alang sa mga makasasala"? Ato kining
ipasabot tungod kay basig maghunahuna kita nga mas pinangga sa Ginoo ang mga
makasasala kaysa mga matarong. Sa pagkatinood, ang ebanghelyo karon usa ka
Maayong Balita para kanatong tanan tungod kay kitang tanan makasasala man. Bisan
ang mga tawong matarong aduna may kahuyang ug kakulang sa kahingpitan. Ang
problema sa mga Pariseo ug mga Saduseo mao kini: Dali ra nilang makita ang mga
sala sa uban, apan buta sila sa ilang mga kasaypanan. Hinaot unta nga dili kita
mahisama kanila. Angkonon nato ang atong pagkamasalaypon, apan sama ni Levi, atong
biyaan ang daang kinabuhi ug sundon si Cristo.
