Marcos 2:18-22. “Magpuasa ba
diay ang mga dinapit sa kumbira sa kasal samtang ang pamanhonon uban pa kanila?
Dili gayod! Apan kon kuhaon na ang pamanhonon, anha pa sila magpuasa.” Sa Iyang
pagsulti niini, gipasabot ni Jesus nga ang kinabuhi sa mga disipulo pagaubanan
og sagol nga kasakit ug kalipay. Adunay kasakit tungod kay ang mga tinun-an
kinahanglan man nga malimot sa kaugalingon ug magpas-an sa krus. Matag adlaw
gidapit sila nga magsakripisyo para sa isigkatawo. Apan ang maong kasakit dili
makadaot kondili makapalig-on hinoon sa ilang kaugalingon. Ug adunay kalipay
tungod kay ang pagsunod ni Cristo maghatag man sa mga tinun-an og nindot nga
kahulogan sa kinabuhi. Diha sa paghigugmaay ug pag-alagaray, masinati nila ang
kalipay nga walay sama.
