Monday, January 14, 2013

Monday of the 1st Week in Ordinary Time (Year C)


Marcos 1:14-20. Kanus-an man kita angay’ng motubag sa pagdapit ni Cristo? Karong semanaha mosugod kita ning gitawag sa Simbahan og “Ordinaryong Panahon”. Ang Ordinaryong Panahon bililhon gihapon tungod kay diha sa ordinaryo ug inadlaw-adlaw natong kinabuhi kita gitawag nga mosunod sa mga lakang ni Cristo. Adunay mga tawo manggihatagon lamang kon Pasko. Kon dili Pasko, laog kaayo ug dili makamaong malooy sa isigkatawo. Ang uban maghinulsol lamang kon Kwaresma. Human sa Kwaresma pwerteng salbahisa. Aduna say uban, mosimba ug mag-ampo kon Domingo. Gikan sa Lunes kutob Sabado, ang ilang kinabuhi murag walay Ginoo. Dili kini sakto. Ang tinood nga Kristiyano buotan ug kasaligan bisan sa panahon nga ordinaryo.