Mateo 26:14-25. “Unsa may
inyong ihatag kanako kon akong itugyan kaninyo si Jesus?” Kining pangutana ni
Judas sa mga kadagkoan sa mga Judio nagpakita nga andam siya modawat og bahandi
aron budhi-an ang iyang Ginoo. Mangutana kita sa kaugalingon karon: Aduna bay
kantidad, butang, o kalipayon nga sarang makapahimo kanatong maluibon sa Dios? Adunay
mga tawo nga tungod sa kwarta magbuhat na og dili maayo, sama sa pagbaligya’g
boto. Aduna puy mga tawo nga tungod sa kabiling yuta, mahimo nang mopatay og
laing tawo. Aduna usay uban nga tungod sa kaulag malimot na sa ilang
gipanumpaan diha sa simbahan panahon sa ilang kaminyoon. Dili unta kita
mahisama kang Judas nga ibaylo ang Ginoo sa mga butang nga lumalabay lamang.
