Juan 5:1-16. Nagmatinud-anon
ba kita sa atong pagbalik sa Ginoo? Daghang tawo mobalik sa Ginoo kon aduna nay
bation sa lawas. Anha pa mabuotan kon masakit na. Apan kon maayo na, mobalik na
pud sa daang binuhatan. Aduna puy mga tawo nga magbinuotan kon muabot ang
dagkong suliran. Apan kon masulbad na ang problema, magpakasala na usab. Sayop
kini nga kinaiya. Diha sa ebanghelyo, human ayoha ni Jesus ang tawo nga
nagmasakiton sulod sa 38 ka tuig, iya kining gipahimangnoan, “Tan-awa, naayo ka
na. Ayaw na pagpakasala aron dili ka mahiagom sa labi pang mangil-ad nga
hitabo.” Ning Kwaresma gipahinumduman kita nga ang sala magdala gyod og kadaot
ug kasakitan sa tawo. Buot sa Ginoo nga human kita mamaayo ug mapasaylo, mobiya
na gyod kita sa mga daotang bisyo.
