1 JUAN 2:22-28. Unsa man ang kamatuoran nga angay natong huptan ug ipasa sa atong mga kabataan? Ang unang sulat ni San Juan nagtudlo nga si Hesus mao ang Kristo, ang Manluluwas nga maghatag kanato og kinabuhing walay katapusan. Kini mao ang kamatuoran. Adunay moingon nga ang kwarta ug bahandi maoy atong kaluwasan ug kalipay; ang uban magdasig nga ang alkohol, droga ug sex maoy makapawala sa atong problema ug maghatag og himaya; samtang ang laing uban moangkon nga sila mismo maoy magdala’g grasya ug kalamboan sa katawhan. Kini sila ang mga modernong bakakon ug kaaway ni Kristo. Dili nato sila paminawon. Si Hesus lamang ang atong Dios ug Manluluwas. Siya ang atong simbahon, paminawon ug sundon matag adlaw sa atong kinabuhi ug hangtod sa kahangtoran.
JUAN 1:19-28. Unsaon man nato pagdawat ang mga
pasidungog sa mga tawo? Ang mga tawo nagtan-aw kang Juan nga usa ka bantogang
propeta. Daghan ang naghunahuna nga siya mao ang Mesiyas. Mahimo niyang dawaton
kining maong pagdayeg ug pahimuslan ang sayop nga pagtoo sa mga tawo. Apan wala
kini buhata ni Juan. Hinoon, gisultihan niya ang mga tawo sa iyang tinuod nga
papel nga mao ang pag-andam sa dalan nga agian sa Ginoo. Talagsaon kining
kinaiya nga gipakita ni Juan tungod kay kadaghanan sa mga tawo gusto man nga
daygon ug yukboan. Ang panig-ingnan ni Juan magdasig kanato sa pagpabiling
matinud-anon ug mapaubsanon bisan kon kita mapuno na sa pagdayeg sa mga tawo.
Hinumduman nato nga ang tanang kaayo nagagikan sa Ginoo, ug kon wala Siya, wala
usab kitay mahimo.
No comments:
Post a Comment