MONDAY AFTER THE EPIPHANY (YEAR B)

1 JUAN 3:22-4:6. Unsa may atong buhaton aron kita mahiusa sa Dios? Ang Unang Sulat ni San Juan nagsugyot og usa ka pamaagi aron kita mahilambigit sa atong Magbubuhat: “Ang nagtuman sa mga sugo sa Dios anaa sa Dios, ug ang Dios anaa kaniya.” Kalabot sa kasugo-an, ang maong Sulat nagkanayon: “Ang gisugo sa Dios mao nga motuo kita sa Ngalan sa Iyang Anak nga si Hesu-Kristo ug maghigugmaay sumala sa sugo ni Kristo.” Nindot ug klaro kini nga pagtulon-an. Pinaagi sa pagdawat kang Kristo ug sa pagsunod sa Iyang mga buhat sa gugma ug pagpangalagad, kita mahiusa sa Dios. Si Pope Francis nagwali sa susamang mensahe pinaagi sa pag-ingon: “Dili kita mahimong suod sa isigkatawo kon kita dili higala sa Dios. Ug dili usab kita mahimong suod sa Dios kon kita dili higala sa isigkatawo."

MATEO 4:12-17, 23-25. Unsa may timailhan nga natapos na ang kagabhi-on ug magsugod na ang kabuntagon? Kini ang pangutana sa usa ka magtutudlo ngadto sa iyang mga estudyante. Usa ka bata ang mitubag: “Titser, makahibalo kita nga natapos na ang kagabhi-on ug magsugod na ang kabuntagon kon maklaro na sa akong mga mata ang kalainan tali sa kahoy nga mangga ug acasia.” Ang titser miingon: “Sayop.” Dihay laing bata nga misugyot: “Magsugod na ang kabuntagon kon maklaro na sa akong mga mata ang kalainan tali sa iro ug iring.” Apan ang titser miingon: “Sayop. Sa pagkatinood, ang kagabhi-on matapos na ug ang kabuntagon magsugod na kon diha sa isigkatawo makita na nato si Kristo. Kay kon dili, ang kalibotan magpabilin pa sa mangitngit nga kagabhi-on.”