JANUARY 3

1 JUAN 2:29-3:6. Kinsa man ang mga anak sa Dios? Ang Katolikong Pagtulon-an nagtudlo nga pinaagi sa bunyag diha ni Kristo kita nahimong mga sinagop nga mga anak sa Dios. Kini ang pinakadako ug pinakabililhong gasa nga atong nadawat gikan sa Ginoo. Pinaagi niini kita nahimong manununod sa Gingharian sa Dios, usa ka butang nga dili mabaylo-an sa bisan unsang bahandi ning kalibotan. Apan, ang maong gasa usa usab ka dakong responsabilidad. Isip binunyagan aduna kitay kaakohan sa pagpuyo’g kinabuhi nga subay sa kinabuhi ni Kristo. Matod pa sa Unang Sulat ni San Juan, “Ang tanan nga anaa kang Kristo dili na angay magpuyo sa sala; ang magpadayon sa pagpakasala wala pa makakita ni makaila Kaniya.” Nga sa ato pa, kadto lamang magbuhat og matarong maoy tinuod nga sumusunod ni Kristo ug maisip nga mga anak sa Dios.

JUAN 1:29-34. Unsa may gipasabot sa ngalang HESUS – ang labing balaang ngalan nga atong gipasidunggan karong adlawa? Ang Hesus nagagikan sa Hudiyong ngalan nga Yeshua (Joshua) nga nagpasabot, “Ang Ginoo mao ang kaluwasan”. Diha sa ebanghelyo, si Hesus gitawag ni Juan nga “Kordero sa Dios nga nagawagtang sa sala sa kalibotan.” Ang hulagway sa kordero o nating karnero kanunay natong makita diha sa Balaang Kasulatan. Kasagaran, ang kordero nagpasabot sa usa ka biktima nga ihalad o isakripisyo sa altar. Para sa mga Kristiyanos, si Kristo mao ang bag-ong kordero kang kinsang kinabuhi, lawas ug dugo, gihalad alang sa atong kaluwasan. Ang Santos nga Misa kanunay’ng magpahinumdum kanato sa dakong gugma ug sakripisyo ni Hesus, ang kordero sa Dios.