TUESDAY OF THE 1ST WEEK IN ORDINARY TIME (YEAR B)

HEBREO 2:5-12. Unsa man kabililhon ang tawo para sa Ginoo? Ang Balaang Kasulatan nagtudlo sa talagsaong dignidad sa tawo ug sa iyang papel sa pagdumala sa tanang kabuhatan sa Dios. Ang Sulat sa mga Hebreo nagkanayon: “O Dios, unsa man ang tawo nga gitagad mo man siya? Unsa ba gayod ang tawo nga nag-amoma ka man kaniya? Gibuhat mo siya nga ubos lamang og gamay sa mga anghel, gihatagan mo siyag himaya ug dungog nga angay lamang sa hari, ug gihimo mo siyang magbubuot sa tanang butang.” Ang pagtagad sa Dios para sa tawo dili na gayod kaduhaduhaan sa dihang Iyang gipadala ang Iyang labing pinanggang Anak aron maghalad sa Iyang kinabuhi para sa kaluwasan sa tanang katawhan. Busa, sa sunod higayon nga kita maghunahuna sa pagpasakit og tawo, hinumduman nato giunsa siya paghigugma sa Ginoo.