1 JUAN 5:14-21. Unsa man
ang salang “mortal” ug ang salang “venial”? Ang Unang Sulat ni San Juan
nagtudlo nga adunay kalainan sa duha ka matang nga sala: Ang una mao ang sala
nga dili mosampot sa kamatayon; ug ikaduha mao ang sala nga magdala sa tawo
ngadto sa kamatayon. Kini maoy nahimong sumbanan sa Katolikong pagtulon-an
mahitungod sa salang mortal ug venial. Ang salang mortal mao kadtong mabuhat sa
tawo nga dagkong kalapasan sama sa pagpatay, pagpangabit, pagdagmal sa
ginikanan, ug uban pa; ug mabuhat sa tawo nga gawasnon (dili pinugos) ug may
igong salabotan (dunay kahibalo sa epekto ug sangputanan). Samtang ang salang
venial mao kadtong mabuhat sa tawo nga gagmay’ng kalapasan, o kon dagko man, mabuhat
nga dili gawasnon (napugos o nadala sa kusog nga emosyon) ug walay saktong
kahibalo.
JUAN 3:22-30. Unsa may
atong buhaton aron mahimong mapaubsanon? Dili sayon ang pagpaubos ilabina kon
daghan ikaw og nahibaloan. Kon dili magbantay, ang tawo nga adunay mga talento
mahimong hambogero ug garboso. Diha kang Juan Magbubunyag atong makat-onan ang
duha ka paagi sa pagpabiling mapaubsanon. Una, giila ni Juan nga adunay mas
labaw pa kay kaniya – ang Ginoo. Atong dawaton nga bisan unsa nato kamaayo,
aduna gayoy lain nga mas maantigo pa kay kanato. Kinahanglan makamao kitang
magpatabang sa isigkatawo ug sa Ginoo. Ug ikaduha, gikalipay ni Juan ang
pagkahimong inila ni Kristo. Wala siya maguol o mahadlok nga si Kristo molabaw
kaniya sa kasikat o pagkainila. Sama kang San Juan, dili kita angay’ng masina
sa mga tawo nga molabaw kanato. Atong isipon ang ilang kalampusan nga atong
kadaogan.
No comments:
Post a Comment