1 JUAN 4:11-18. Unsa may
tambal sa kahadlok? Nagkalain-lain ang kahadlok sa tawo – adunay mahadlok sa
kaaway, sa hinigugma, sa katalagman, sa sakit, sa kamatayon, ug uban pa. Kon
kita gihari-an sa daghang kahadlok, angay natong pamalandongan ang mga pulong
sa Unang Sulat ni San Juan: “Walay kahadlok diha sa gugma. Ang gugmang hingpit
magwagtang sa tanang kahadlok.” Tinuod baya kini. Ang tinuod nga gugma makahupay
sa tanang kahadlok ug kabalaka. Kon mahigugmaon kita, kinsa may masuko kanato?
Kon mapuno kita sa gugma, kinsa may makaako og biya kanato? Kon kita nahiusa sa
Dios diha sa gugma, nganong mahadlok man kita nga madisgrasya, masakit o
mamatay? Sakto si San Juan sa iyang pagsulat, “Kon mahadlok gihapon ang tawo,
wala pa mahingpit ang iyang gugma.”
MARCOS 6:45-52. Pasagdan
ba kita sa Ginoo panahon sa mga suliran ug kalisdanan? Usa ka inahan ang niduol
kanako ug nagpahungaw sa daghan niyang mga problema – lawas nga masakiton,
bisyosong bana, anak nga badlongon, kawad-on sa kwarta, ug uban pa. Ako siyang
gipangutana: “Sa kalisod sa imong kinabuhi, motuo ka pa ba nga ang Ginoo
mahigugmaon?” Niyango siya, dayon nibakho sa paghilak. Unya ako siyang
giingnan: “Ate, bulahan ka kaayo tungod sa kadako sa imong pagtuo. Bulahan ka
nga mituo nga bisan sa kalisod wala ikaw pasagdi sa Ginoo.” Ang ebanghelyo
nagtudlo nga si Hesus kanunay’ng nagsud-ong ug nagbantay sa iyang mga ginsakopan.
Sa panahon sa unos ug kalisod, moduol siya kanato aron magdala’g kalinaw ug
kahupayan. Mahimo niya kini tungod kay kontrolado niya ang tanan.
No comments:
Post a Comment