THURSDAY AFTER EPIPHANY (YEAR B)

1JUAN 4:19-5:4. Mahimo ba nga atong higugmaon ang Dios ug dili tagdon ang isigkatawo? Ang Unang Sulat ni San Juan adunay klarong tubag niini: “Kon may moingon, ‘Nahigugma ako sa Dios’,apan nagdumot sa iyang isigkatawo, bakakon siya; kay unsaon man niya paghigugma ang Dios nga dili makita kon siya walay gugma sa isigkatawo nga iyang makita? Kini ang gisugo ni Kristo: Ang nahigugma sa Dios kinahanglan mahigugma sa iyang isigkatawo.” Kon mao kini, unsa may atong hagit isip mga magtutoo? Ang tema sa pagduaw sa Santo Papa dinhi sa Pilipinas maghatag kanato og ideya: “Kalooy ug Kamabinati-on” (Mercy and Compassion). Kining duha ka mga hiyas kinahanglan nga atong ugmaron diha sa atong kaugalingon matag adlaw. Magpabilin kita nga maloloy-on, masinabtonon ug matinabangon sa isigkaingon.

LUKAS 4:14-22. Unsa may tuyo sa Dios sa pagpahimugso kanimo ning kalibotan? Sa iyang paghingkod si Kristo nakasabot nga aduna siyay dakong misyon sa kinabuhi. Gipili siya aron maghatag og katumanan sa panagna ni Isaias – ang “pagsanyaw sa Maayong Balita ngadto sa mga kabus …” Sama kang Kristo, matag usa kanato gipakatawo nga may diosnong katuyoan. Dili mahitabo nga ania kita sa kalibotan nga walay hinungdan. Usa ka amahan miingon sa iyang anak, “Dong, mag-ampo ta sa Ginoo para sa atong silingan aron makakita siya’g kwarta nga ipalit og tambal.” Apan mitubag ang bata, “Tay, dili na nato samokon ang Ginoo. Kita na lay hatag sa atong silingan og kwarta para sa iyang tambal.” Bisan sa iyang pangedaron, ang maong bata nakasabot sa iyang misyon ning kalibotana.