TUESDAY AFTER THE EPIPHANY (YEAR B)

1 JUAN 4:7-10. Unsa man ang tinuod nga gugma? Ang Unang Sulat ni San Juan nag-ingon: “Ang matuod nga gugma mao kini: dili kita maoy unang nahigugma sa Dios, kondili Siya maoy unang nahigugma kanato, ug gipadala niya ang Iyang bugtong Anak aron pinaagi kaniya mapasaylo ang atong mga sala.” Ang kalidad sa matuod nga gugma atong makita diha sa gugma sa Dios kanato: Andam kini nga molihok, mohatag sa kaugalingon, ug mag-sakripisyo alang sa kaayohan ug kinabuhi sa tawo nga gihigugma. Kon wala kini, ang gugma nga gipamulong walay hinungdan. Sakto ang pahimangno nga nag-ingon: “When someone says ‘I love you”, watch his actions more than his words” (“Kon adunay moingon kanimo ‘Gihigugma ko ikaw’, bantayi ang iyang mga lihok labaw sa iyang mga pulong.”

MARCOS 6:34-44. Unsa man ang tinood nga kalooy? Ang tinood nga kalooy dili lamang usa ka pagbati sa kaguol o kasubo. Dili kini mapadayag pinaagi lamang sa paghilak o paggakos sa tawong gikaloy-an. Diha sa ebanghelyo gipakita ni Kristo sa iyang mga tinun-an nga ang matuod nga kalooy magtuklod kanila sa pagpakighiusa sa mga gikaloy-an ug sa paglihok alang sa ilang kaayohan. Si Hesus gibati’g kalooy sa bagang katawhan nga nagsunodsunod kaniya kay mura man sila’g mga karnero nga napasagdan. Nisugyot ang mga tinun-an nga papaulion ang mga tawo, apan wala kini niya buhata. Hinoon, giatiman ug gitubag ni Hesus ang ilang espirituhanon ug lawasnong panginahanglan pinaagi sa paghatag kanila og diosnong pagtulon-an ug sa pagpakaon kanila og isda ug pan.