Lucas 1:26-38. Unsa man ang atong
makat-onan sa solemnidad sa Immaculada Concepcion? Si Adan ug Eva gihimo nga
walay mansa sa sala. Gawasnon sila ug malipayon nga nagpuyo sa paraiso. Apan
nagpadala sila sa bakak sa bitin ug gisupak nila ang sugo sa Dios. Tungod sa
sayop nga paggamit sa kagawasan, misulod sa kalibotan ang kasakit ug kamatayon.
Ang tanan nga nahimugso human kang Adan ug Eva gipakatawo nga may Salang
Panulondon. Ang tanan namansahan sa sala, gawas kang Maria nga giandam nga
mahimong inahan sa Dios. Gawasnon usab si Maria, apan nagpabilin siyang
masinugtanon sa Ginoo. Pinaagi kang Maria, napamatud-an nga uban sa langitnong
grasya mahimo sa tawo ang pagdumili sa mga pagdani sa daotan ug ang pagsunod sa
kabubut-on sa Dios.
