Mateo 11:28-30. Unsa may gipasabot ni
Cristo sa iyang pag-ingon, “Sayon ang yugo nga akong ihatag kaninyo, ug gaan
ang ipapas-an ko kaninyo”. Ang yugo nahimong simbolo sa pagpangalagad tungod
kay kini usa man ka instrumento nga itaud sa mananap aron makaserbisyo sa iyang
agalon. Ang yugo ni Cristo sayon ug gaan tungod kay ipapas-an man kini uban sa
gugma. Kon mahigugma kita sa atong trabaho, dili gyod kita bation og kakapoy.
Kon mahigugma kita sa mga tawo nga atong gialagaran, dili gyod kita abuton og
kaluya. Nganong lami man ang pagkaon nga niluto sa inahan? Kini tungod kay ang
pagkaon giluto man uban sa gugma. Nganong gaan man pas-anon ang atong igsoon?
Kini tungod kay ang atong gipas-an ato man nga hinigugma.
