Mateo 1:1-17. Unsa may pagbati nato sa
atong mga katigulangan? Ang atong katigulangan pwede nga maghatag kanato’g
dungog; pwede usab sila nga maghatag og kaulawan. Kasagaran, ikaulaw nato ang
mga kaliwat nga nakahimog dakong sala. Apan dili ingon niini ang pagbati ni San
Mateo. Ang iyang listahan sa kaliwat ni Jesus nag-apil sa mga tawo nga
nakahimo’g eskandalo sama kang Rahab nga usa ka daotang babaye ug kang David
nga nakigrelasyon kang Batsheiba nga asawa sa iyang sundalo. Pinaagi niini,
gipakita sa ebanghelyo ang dakong tuyo sa pagpakatawo sa Ginoo nga mao ang
pagpasaylo ug pagluwas sa mga makasasala. Hinaot nga kita usab makat-on sa
pagpasaylo sa atong mga kaliwat nga makasasala alang sa kalinaw ug kaayohan sa atong
pamilya.
