Lucas 2:16-21. Unsa may
kahulogan sa pagpasidungog ni Maria, ang Inahan sa Dios, ning unang adlaw sa
tuig? Pinaagi niini gitudloan kita sa Simbahan nga magpuyo isip mga sumusunod
ni Cristo uban sa giya ug panalipod sa Mahal nga Birhen. Sa iyang kinabuhi,
nasinati ni Maria ang mga kalipay ug kasakit. Dihay mga higayon nga naglibog
siya ug naglisod sa pagsabot. Apan nabatasan ni Maria nga handumon ug
pamalandongan ang tanang mahitabo sa iyang kinabuhi. Nag-ampo ug namalandong
siya kanunay aron iyang masabtan ang kabubut-on sa Dios. Sama ni Maria, angay
kita’ng mogahin og panahon sa pagpamalandong sa mga nagakahitabo sa atong
kinabuhi aron ato usab nga masabtan ang plano ug kabubut-on sa Dios para
kanato.
