Lukas 1:5-25. Unsa man ang bili ug katuyoan sa
matag bata nga mahimugso ning kalibotan? Sa ebanghelyo ang tigulang nga
magtiayon nga si Zacarias ug Isabel gihatagan sa Dios sa dugay na nilang
gipangandoy – usa ka anak nga tawgon og Juan, ngalan nga nagpasabot “Ang Ginoo
nagpakita og dakong kaayo”. Ang matag tawo nga mahimugso usa ka gasa sa Dios ug
adunay papel sa kalibotan. Si Juan gipakatawo ubos sa gahom sa Dios aron
mag-andam sa dalan sa Mesiyas. Sa samang paagi, matag usa kanato gasa sa Dios
para sa atong mga ginikanan ug para sa kalibotan. Kabubut-on sa Dios nga kita
mahimugso ug aduna siyay tuyo sa pagbuhat kanato. Gipakatawo kita aron
makighigala sa Kaniya, magdumala sa Iyang kabuhatan, ug magdala sa Iyang gugma
ngadto sa usag-usa.
