Lucas 4:1-13
Ang tintasyon
kabahin sa kinabuhing tawhanon. Sa matag adlaw atong masinati ang daghan
kaayong matang sa pagtintal nga magagikan sa gahom sa kangitngit. Usa kini ka
pait nga kamatuoran tungod kay ang tintasyon magpabilin man kanato hangtod sa
atong pagkatigulang, ug bisan gani sa katapusang yugto sa atong kinabuhi.
Kitang tanan pagatintalon sa yawa nga magkinabuhi nga sukwahi sa kabubut-on sa
Dios. Si Jesus nga nagpakatawo sama kanato nakisanati usab sa pagtintal sa yawa,
apan migawas siya nga malig-on ug madaugon batok sa tanang pagsulay. Siya karon
maoy atong kusog ug kadasig sa pagpakigbatok sa tanang tintasyon gikan sa yawa.
Kon kita mag-uban kanunay kang Jesus, walay rason nga kita madaog sa mga
pagsulay sa daotan.
Tulo ka butang ang
kanunay gamiton sa yawa sa pagkabig sa tawo palayo sa Dios: ang butang
materyal, ang gahum ug ang dungog. Giingon niya niini pagtintal si Jesus --
“Himoang pan kining bato aron mabusog ka”; luhod ug simbaha ako ug ihatag ko
kanimo ang tanang gahum”; “Patighulog gikan aning taas nga lugar aron saluhon
ka sa mga anghel ug ang mga tawo magdayeg kanimo.” Hangtod karon, ingon ani
gihapon nga pamaagi ang gigamit sa yawa, Nasayod ang yawa nga epektib kining
tulo: salapi, gahum ug dungog. Mao ni sila ang dali makapaluya sa kasingkasing
sa tawo.
Bahandi, gahum ug
dungog – magkuyog gyud ning tulo. Ang tawong madato dali ra magamhanan, ang
tawong gamhanan dali ra mainila, ug ang tawong sikat dali ra pud makasapi. Kon
aduna ta bisan usa aning tulo, angay gyod tang magbantay aron dili ta mahulog
sa impyerno. Ngano man?
Una sa tanan, ang
salapi, gahum ug dungog dili makatagbaw. They are like sea water; the more you
drink of it, the thirstier you become. Ug basi sa kasinatian, tinuod kining
maong panultihon. Sa sinugdan, makontento na kita sa ginatos. Pero kadugayan
mangandoy kita og linibo kay dili na kita malipay sa ginatos lang. Pag duna na
kitay linibo, mangita na pud tag minilyon. Hangtod unsa kadako sa bahandi ang
makalipay kanato? Bisan sa gahum daghan ang walay katagbawan. Naay natigulang
na sa politika pero molansar pa gihapon. Naa puy presidente nga magpapili pa
gyud sa pagkakongresista. Hangtod kanus-a ka man mohawid sa gahum? Hangtod pila
ka tawo ang gusto nimo nga magdayeg kanimo? Giila ka na sa tibuok kalibutan nga
pinakamaayo nga boksingero, apan ngano nga mag-apil pa man ka sa politika? Dili
pa ba igo nimo ang dungog nga imong naangkon?
Dugang pa niini,
angay kitang magbantay sa salapi, gahum ug dungog tungod kay kini sila
makapadako sa atong ulo ug kasingkasing. Kon aduna ta ani nila, maghunahuna
dayon kita nga importante na ta kaayo ug nga kita ang sentro sa tanan ning
kalibutan. Mo-develop kita og illusion nga kon wala kita, maglisod ang
kalibutan. (Storya sa sunoy nga gatoo nga siya ang makapasubang sa adlaw). Sa
pagkatinuod, ang kalibutan magpadayon sa iyang pagdagan bisan kon wala na kita
tungod kay ang Dios, dili kita, ang nagpadagan niini.
Niining panahon sa
kwaresma, gipahinumduman kita sa Simbahan nga kon wala ang Dios wala kitay hinungdan.
Niadtong Mierkoles Badlis, giingnan kita sa pari, “Gikan ikaw sa abo, ug sa abo
ikaw mopauli.” What a painful reminder! Tinuod abo ra gyod kita. Apan tungod sa
Dios, nahimo kitang bililhon. Gihimo kita niya sumala sa iyang hulagway ug
kasamahan. Unya, gihimo kita niyang mga sinagop pinaagi ni Cristo. Kining maong
kamatuoran unta makapahimo natong mapaubsanon sa kanunay. Sa Dios kita angay
mosandig, dili sa atong kwarta, gahum ug dungog, tungod kay Siya maoy naghimo
kanatong bililhon ning kalibutan.
Sa panahon sa
Kwaresma, kita usab gihagit nga dili magpadani sa tintasyon sa yawa. Ang atong
bahandi, gahum ug pangalan mahimo lamang bilihon kon kini atong gamiton sa
pag-alagad sa bagang katawhan.
