Lukas 11:29-32. Unsa man ang
makapangil-ad sa usa ka katilingban? Diha sa ebanghelyo si Jesus nakatuwaw diha
sa pag-ingon, “Pagkadautan gayod sa katawhan niining panahona!” Nabungat niya
kini tungod kay ang mga tawo nidumili sa pagtoo kaniya bisan sa mga milagro nga
iyang gihimo sa ilang atubangan. Ang katilingban, o bisan ang pamilya, nga
walay pagtoo sa Dios mapuno gayod sa kadautan sama sa pagkalaog, pagkasina,
pagdumot, panag-away ug uban pa. Ning Kwaresma, atong pangayoon sa Ginoo ang
grasya nga makakita kita sa Iyang presensya diha sa mga tawo, mga binuhat ug
mga panghitabo sa atong kinabuhi. Ang Iyang talagsaong gugma magdani unta
kanato sa pagbiya sa sala ug sa pagpuyo sa kinabuhing Kristohanon.
