Marcos 7:1-13. Unsa may
mahitabo kon ang atong mga maayong buhat ug mga pag-ampo dili kinasingkasing?
Diha sa ebanghelyo gisaway ni Jesus ang mga Pariseo ug mga magtutudlo sa Balaod
pinaagi sa paggamit sa mga pulong ni propeta Isaias nga nagkanayon: “Kining mga
tawhana nagpasidungog kanako sa pulong lamang, apan ang ilang kasingkasing
halayo Kanako.” Sa mga mata sa Ginoo, ang mga pulong sa pag-ampo, ug bisan ang
mga saktong buhat, mawad-an og bili kon kini dili pagaubanan og maayong
kasingkasing. Kining ebanghelyo maghagit kanato sa pagsusi sa mga pagsimba ug
mga apostolado nga atong ginahimo. Maayo kon ato kining gibuhat aron sa
pagdayeg sa Ginoo; apan salawayon kini kon atong gihimo aron lamang ipakita sa
mga tawo.
