Lucas 5:27-32. Unsa may angay
buhaton sa makasasala? Para sa mga Pariseo, ang makasasala angay'ng silotan,
dili higalaon. Apan, dili ingon niini ang pagbati ni Jesus. Matod pa niya, “Ang
doktor dili para sa mga walay sakit; ang mga masakiton maoy nanginahanglan kaniya.”
Klaro ni Jesus ang Iyang dakong misyon sa kalibotan: “Mianhi ako aron pagdalag
kapasayloan; Gitawag ko ang mga makasasala, dili ang mga matarong.” Kining
ebanghelyo usa ka maayong balita para kanato tungod kay kitang tanan makasasala
man ug nanginahanglan sa kalooy sa Dios. Ning panahon sa Kwaresma atong
seryosohon pagsanong ang pagdapit ni Jesus. Sama kang Levi, atong biyaan ang
daan natong pagkatawo ug magsugod kita sa paglakaw subay sa dalan nga gisubay
ni Cristo.
