Wis
7:7-11; Heb 4:12-13; Mk 10:17-31
Dihay usa ka tawo nga nanimpalad sa layong
dapit aron mangita og kwarta. Human siya makatigum og igo nga bahandi,
nakahukom siya nga mopauli na sa ilang lugar ug misakay sa usa ka barko. Iyang
gibakos sa iyang hawak ang mga sinsilyong bulawan ug plata nga iyang natigum
sulod sa pipila ka tuig niyang pagpanarbaho. Sa didto na ang barko taliwala sa
lawod, nabuslot kini nga wala dahuma ug hinayhinay nga miunlod. Aron maluwas sa
tawo ang iyang kaugalingon, kinahanglan siya nga molukso sa dagat uban sa
daghang pasahero aron mangita og isla nga kadangpan. Ug aron siya makalangoy,
kinahanglan usab niya nga huboon ang iyang gibakos nga mga bulawan ug plata.
Apan tungod sa gibati nga kaanugon, wala gyod niya kini himoa ug misulay siya
sa paglangoy uban sa kabug-at sa mga bulawan ug plata. Human sa pipila lamang
ka minuto, naluya siya sa paglangoy ug miunlod sa dagat uban sa bahandi nga
iyang gikasayangan.
Ang maong estorya gitapos sa usa ka
pangutana: Maingon ba nato nga kadtong maong tawo nakahupot sa bahandi o ang
bahandi ba hinoon ang nakahupot sa maong tawo?
Kon kita kaha ang pahukmon, unsa may atong
palabihon – ang bahandi o ang kinabuhi?
Sayon ra kaayo isulti nga “kinabuhi” ang atong pilion. Gani, makaingon kita nga
bulok gayod ang tawo nga mopili sa bahandi labaw sa iyang kinabuhi. I-asa man
ang bahandi kon kita patay na, dili ba? Apan, sa pagkatinuod lang, daghan
kanato bulok basta bahandi na ang hisgotan. Unsa man diay atong ikasulti sa
tawo nga halos dili na mopahulay sa pagtrabaho aron pagpadaghan sa tinigum?
Unsa may atong itawag sa tawo nga mahutdan na og panahon para sa kaugalingon ug
sa pamilya kay magsigi na lang og “overtime” sa opisina? Unsa man diay atong
ikasulti sa tawo nga manikas ug mamintaha sa uban aron mas makaginansya? Unsa
may atong itawag sa tawo nga mangurakot sa gobyerno aron maadunahan? Unsa may
atong ikasulti sa tawo nga mosugal sa iyang lawas ug kalag tungod ug alang sa
kalibutanong bahandi? Maalamon ba o bulok?
Usa ka tawo ang niduol kang Hesus ug
nangutana kon unsay angay niyang buhaton aron makabaton og kinabuhing dayon.
Maingon nato nga relihiyoso kining maong tawo tungod kay nahingawa siya dili
lang sa iyang kinabuhi karon kondili sa kinabuhi human ning kalibutana. Gani,
matod pa niya, gituman niya ang mga sugo sa Dios sukad pa sa iyang pagkabata.
“Usa na lang ang imong kulang”, hagit ni Hesus kaniya. “Ibaligya ang tanan mong
kabtangan, ihatag ang halin sa mga kabos, ug maimo ang bahandi sa langit”. Kini na ang pinakadakong hagit! Dili lang ni
bahandi batok kinabuhi kondili bahandi batok kinabuhing walay katapusan uban sa
Dios. Unsa may palabihon mo?
Ang ebanghelyo nag-ingon nga ang maong tawo
nahugno sa pagkadungog niya sa hagit ni Hesus ug milakaw siya nga masulub-on
tungod kay dato man siya kaayo. Pastilan no! Unsa may atong ikasulti ning maong
tawo? Adunay magsusulat nga miingon nga kining maong tawo giharian sa kalaog.
Ang iya lamang kaugalingon ang iyang gihunahuna ug tungod niini midumili siya sa
pagpaambit sa iyang bahandi ngadto sa mga kabos. Ang laing magsusulat miingon
nga dili kalaog kondili garbo ang sala ning maong tawo. Nagtoo siya nga ang
iyang bahandi bunga sa iyang kaugalingong pagpaningkamot lamang. Nalimot siya
nga kon wala ang panalangin sa Dios dili gayod siya maadunahan. Ug tungod sa
iyang garbo, wala siya makakita og hinungdan ngano nga ipanghatag niya ang
iyang kabtangan ngadto sa uban.
Ang maong dato nga mibalibad sa hagit ni Kristo
nagpakita lamang sa iyang pagkatawhanon. Sama sa daghang tawo nasilaw siya sa
kalibutanong bahandi. Sama sa uban giangkon niya ang bunga sa iyang mga kahago.
Sama sa daghang tawo nalimot siya nga ang Dios maoy tag-iya sa tanan. Sama sa
uban nagpanuko siya sa pagtabang sa mga kabos. Ug sama sa daghang tawo nalimot
siya nga dili niya madala ang iyang kabtangan sa lubnganan.
Gitapok sa padre kura ang mga parokyano aron
maghisgot mahitungod sa pagpaayo sa atop sa ilang simbahan nga gubaon na kaayo.
Naghangyo ang pari nga unta motabang ang tanan ug mopadayag sa ilang “pledges”.
Dihay misaad nga mohatag og 50 mil, diha poy misaad og 20 mil, ug dihay daghan
nga misaad og tag libo. Unya, ang pinakadato sa parokya, mitindog ug misaad nga
mohatag og 5 pesos. Nahilom ang tanan nga daw gisungotan sa katihik ani nga
dato. Unya, sa wala damha, dihay kahoy nga gabok nga nahulog gikan sa alkoba ug
didto mitugpa sa agtang sa dato. Sa kakurat ug kalisang, nakaingon ang dato,
“Padre, 5 mil ang akong ihatag, dili 5 pesos!”
Angay natong dawaton nga atubangan sa
bahandi, daghan kanato mabulok o mabugo. Mao man gani nga ang unang pagbasa
karon nagdapit kanato nga mangayo sa Ginoo og gasa sa kaalam sama sa gibuhat ni
Solomon. Sa atong pag-ampo, kanunay kitang malimot sa pagpangayo sa Ginoo sa
mas labing mahinungdanong butang sa kinabuhi, sama sa mga hiyas nga mao untay
makapahimo kanatong matarong ug malipayon. Si Solomon nangayo og kaalam, wala
sa gahum ug bahandi. Ug tungod niini, ang Dios nahimuot pag-ayo kaniya ug nihatag
kaniya og kaalam, bahandi ug gahum nga labaw sa tanan. Karong adlawa, gidapit
usab kita sa pagpaminaw kanunay sa Pulong sa Dios. Ang ikaduhang pagbasa
nagtudlo kanato nga ang matag Pulong sa Ginoo adunay gahum sa pagtandog sa
kinahiladman sa tawo. Kon kanunay kitang maminaw sa Pulong sa Dios, mausab
gayod ang atong kinabuhi ug mamahimo kitang matarong atubangan sa Ginoo ug sa mga
tawo.
No comments:
Post a Comment