TUESDAY OF THE 29TH WEEK IN ORDINARY TIME (YEAR B)

LUKAS 12:35-38. UNSA MAY ANGAY NATONG BUHATON ISIP MGA PINIYALAN SA DIOS? Duha ka butang ang gisugyot sa ebanghelyo. Una, si Hesus miingon, “Ibakos ang inyong bisti”. Ang mga sulugoon panahon sa Bibliya tag-as og sinina. Ang ilang hawakan kinahanglang ibakos aron sila makalihok ug makatrabaho. Sa pag-ingon ni Hesus “ibakos ang inyong bisti”, buot niyang dasigon ang mga tinun-an nga mag-andam kanunay sa kaugalingon alang sa pagpangalagad. Ug ikaduha, si Hesus miingon, “Pasigaa ang inyong lampara”. Ang nagsiga nga lampara maoy gamiton sa pagbuntog sa kangitngit ug paglamdag sa dalan. Sa pagsugo ni Hesus “pasigaa ang inyong lampara” buot niyang hagiton ang mga tinun-an sa pagpakigbatok sa mga daotan ug paghatag og mga maayong panig-ingnan.