Mateo
1:1-16, 18-23. Unsa man ang pinakanindot nga gasa nga atong pwedeng
mahatag kang Mama Mary sa iyang birthday? Kasagarang mga inahan
panahon sa ilang adlawng natawhan makadawat og bestida, sapatos, o
kaha bag gikan sa ilang mga anak. Pero, adunay usa ka inahan nga
miingon kanako, “Padre, nadawat nako ang pinakanindot nga birthday
gift karong adlawa.” Sa dihang gipangutana ko siya kon unsa,
mahinangpon kining mitubag, “Ang akong badlongon nga anak miduol
kanako nga naghilak ug nanumpa nga magbag-o na sa iyang kinabuhi.”
Unsa kaha kon kita usab makaingon sa Mahal nga Birhen, “Mama Mary,
sa imong birthday, manaad ko nimo nga magmatinud-anon na sa pagsunod
sa mga lakang sa imong Anak nga si Jesus.”
