Lucas
6:27-38. Unsa may mahitabo kon kita mag-ampo ug magbuhat og maayo
para sa kaaway? Adunay magtiayon nga hilabihan ka awayon. Ang asawa
miduol sa pari aron magpatambag. “Unsa may buhaton ko padre sa
akong bana? Kada gabii magyawyaw ko niya kay sige lang siyag dula og
tong-its.” Kalmado ang pari nga mitambag sa pag-ingon: “Day,
sugod karon ayaw na siya awaya. Iampo ang imong bana. Pero, pasagdi
siya nga magdula og tong-its.” Tuod man, wala na magsige'g yawyaw
si misis. Nagmalinawon na ang ilang panimalay. Dangtag pila ka semana
miduol kining bana sa iyang asawa ug miingon: “Langga, maulaw nako
nimo kay wala naman ko nimo awaya. Gipangga na nuon ko nimo. Tungod
ani, dili na ako magdula og tong-its.”
