Mateo 9:9-13. Nganong duol man si Jesus
sa mga makasasala? Angay natong sabton nga si Jesus wala makigsuod sa mga
makasasala tungod kay nalipay siya sa daotan nilang binuhatan. Gani, ang
makasasala nga iyang pasayloon hatagan niya og bag-ong tahas: “Lakaw, ug ayaw
na pagpakasala pag-usab.” Si Jesus makighigala sa mga makasasala tungod lamang
kay malooy siya kanila. Matod pa niya, “Ang mga tawo nga walay sakit wala
magkinahanglag doktor, ang masakiton ra.” Ang makasasala usa ka masakiton;
aduna kini problema sa iyang kalag, nga kondili tabangan maoy makaingon sa
iyang kamatayon nga dayon. Hinaot nga kining kapistahan ni San Mateo magdasig kanato
sa pagbiya sa daotan tang kinabuhi ug sa pagsunod sa mga lakang ni Cristo.
