Lucas
7:31-35. Unsa man ang makapahimo sa tawo nga sirado sa pagpaminaw sa
Pulong sa Ginoo? Daghan sa mga Hudiyo nagreklamo sa mga paagi ni Juan
nga Magbubunyag; nagbagolbol usab sila sa mga gipanghimo ni Jesus.
Aduna bay sayop si Juan ug si Jesus? Wala. Sa pagkatinuod, kining mga
tawhana dili lang gyod ganahan maminaw sa mensahe ni Juan ug ni
Jesus. Sa sikolohiya, gitawag kining kinaiya nga problema sa
“selective listening”. Adunay mga tawo nga maminaw sa mga butang
nga gusto nilang madunggan. Apan sa mga butang nga dili nila gusto
mahibal-an, magpabungolbungol. Kon paninglan sa utang, di maminaw.
Kon hisgotan ang bonus, abtik. Kon pahimangno-an sa sala,
magpabungolbungol. Kon kabahin sa grasya, listo.
