PAMALANDONG HULYO 25, 2014 @MATEO 20:20-28. Isip ginikanan, unsa may imong ambisyon para sa imong anak? Natural lamang sa usa ka ginikanan nga mangandoy sa kaayohan sa iyang anak. Diha sa ebanghelyo, ang inahan ni Juan ug Santiago mihangyo kang Jesus nga ang iyang mga anak palingkoron sa wala ug tuong dapit sa trono sa Gingharian. Ang iyang gipangayo walay lain kondili gahom ug dungog para sa iyang duha ka anak. Apan wala kini makapahimuot ni Jesus. Gani, gipahimangnoan niya ang mga tinun-an sa pag-ingon: “Ang usa nga buot mahimong dako, kinahanglan nga mag-alagad sa tanan.” Mas malipay diay ang Ginoo kon ang mga anak mahimong mahigugmaong tawo kaysa mahimong gamhanan o ilado. Busa, sa pagpadako sa mga anak, tudloi sila pinaagi sa maayong ehemplo sa pagkamapaubsanon ug pagkamaalagaron sa isigkaingon.
