MATEO 10:1-7. Ngano man nga
ordinaryong mga tawo ang pilion ni Kristo aron mahimo niyang mga apostoles o
magsasangyaw? Adunay pipila ka mga posibleng hinungdan. Una, ang ordinaryong
tawo adunay daghang panahon para sa Ginoo; dili siya kargado sa mga
kalibotanong panginahanglan o kabalaka. Ikaduha, ang tawong ordinaryo dali ra
nga sugoon; dili siya garboso ug dili gahi'g ulo. Ikatulo, ang simpleng tawo
abli sa bag-ong pagtulon-an; dali ra siyang magiyahan sa Espiritu Santo. Ug sa
katapusan, ang ordinaryong tawo dili magsalig sa iyang bahandi, gahum ug
kaantigohan. Ang iyang dakong pagsalig anaa sa Ginoo, ug tungod niini, daghan
siya'g mahimo. Hinaot nga ang ebanghelyo karon magdasig kanato sa pagpabiling
simple – malipayon, masinugtanon, mapaubsanon, ug masaligon.
