FRIDAY OF THE 14TH WEEK IN ORDINARY TIME (YEAR A)

MATEO 10:24-33. Angay ba natong kahadlokan ang Ginoo? Adunay duha ka matang sa kahadlok. Ang una mao ang kahadlok isip pagbati sa kalisang tungod sa usa ka katalagman o kasakitan nga umaabot o nahitabo na. Ug ikaduha mao ang kahadlok isip pagbati sa dakong pagtahod ug pagkahingangha sa gahum ug kaayo sa usa ka persona. Sa pag-ingon ni Jesus “Kahadloki ninyo ang Dios”, wala niya ipasabot nga angay kitang malisang sa Dios. Kay kon mao kini, nan malipay pag-ayo ang demonyo. Hinoon, buot ni Jesus nga dasigon kita sa pagpakita og dakong respeto ug pagtahod sa Dios. Ang Dios maoy labing gamhanan; sa Iyang mga kamot anaa ang gahum sa paglaglag ug pagluwas. Angay nato Siyang daygon ug pasalamatan tungod kay bisan sa atong kagamay Iya kitang giatiman, gialagaran ug gipakamatyan.