MATEO 12:1-8. Unsa may mas bililhon, ang pagdala og
halad diha sa templo o ang kalooy para sa isigkatawo? Ang mga Pariseo nailhan
sa ilang pagkamatinumanon sa balaod ni Moises. Nag-una sila sa pagrespeto sa
Adlaw'ng Igpapahulay ug sa pagdala og halad nga mananap didto sa templo. Apan
nganong gisaway man sila ni Jesus? Kini tungod kay ang ilang pagtuman sa balaod
wala makahimo nilang maloloy-on; nahimo hinoon silang mahukmanon sa
isigkaingon. Gipahimangnoan sila ni Jesus pinaagi sa pagkutlo sa Kasulatan:
“Dili ako gusto'g mga halad nga mananap, kondili kalooy.” Hinaot nga ang atong pagdala’g
halad sulod sa Santos nga Misa dili unta mabulag sa atong pagtabang sa tawong
nanginahanglan. Ang atong makanunayong pagsimba ug pagtuman sa mga sugo sa Dios
makahimo unta natong mas maloloy-on sa uban.
