MATEO 9:32-38. Unsa may atong
buhaton aron makatabang sa umahan sa Dios? Una sa tanan, angay natong puy-an
ang bokasyon sa pagkamagbalantay sa karnero sama kang Kristo. Dili kita manundog
ni Cain nga wala manginlabot sa iyang igsoon. Matag usa kanato kinahanglan nga
mahimong buotang Samaritano para sa mga nanginahanglan, ilabina sa mga
masakiton, mga tigulang, mga walay trabaho ug mga gigutom. Dugang pa niini,
dasigon ug suportahan nato ang mga batan-on nga buot magpari o magrelihiyoso.
Ang mga pari ug mga madre adunay bililhong papel sa Simbahan tungod kay sila
ang gitahasan sa pag-una sa katawhan diha sa pagpangalagad ug paghatag sa kinabuhi
para sa kaayohan sa tanan. Pinaagi sa ilang Kristohanong panig-ingnan, madasig ang
katawhan sa paghigugmaay ug pagtinabangay sa usag-usa.
